Ғылымның өзекті мәселелері
2023 жылдың 15-16 қарашасында Сәтбаев университетінде «Ғылымның өзекті мәселелері» атты VI халықаралық практикалық интернет-конференциясы өтті.
Қазақстанның еңбек сіңірген қайраткері, әл-Фараби атындағы Қазақстан Республикасы Мемлекеттік сыйлығының лауреаты, профессор, техника ғылымдарының докторы Бағдәулет Кенжалиевтің туғанына 75 жыл толуына арналған конференцияны Қазақстан Республикасының Ғылым және жоғары білім министрі Саясат Нұрбек ашты.
Құттықтау сөз сөйлеген министр Саясат Нұрбек конференция қонақтары мен қатысушыларын ғылым саласындағы маңызды оқиғалардың бірімен құттықтады. Сондай-ақ, ол Қазақстан ғылымына қосқан орасан зор үлесі үшін техника ғылымдарының докторы, профессор Бағдәулет Кенжалиевке алғысын және құрметін білдірді.
«Сәтбаев университеті – университет ғылымының табысты және жарқын үлгісі. Бағдәулет Кенжалиев – университеттің ғылыми-зерттеу ортасының негізін қалаушылардың бірі. Бағдәулет Кенжәліұлы, сіз отандық ғылымның дамуына зор үлес қостыңыз. Сіздің іргелі еңбектеріңіз бен зерттеулеріңіз, атап айтқанда, Сіздің басшылығыңызбен таза селен алудың бірегей әдістері әзірленгенін, бұл елімізде осы химиялық элемент өндірісін жаңа деңгейге шығаруға мүмкіндік бергенін атап өткім келеді», – деп атап өтті министр.
Конференцияға әлемнің 17 елінен ғалымдар, бизнес, ғылым және білім саласының өкілдері қатысты. Екі күндік конференция бағдарламасы кенді және техногендік шикізатты байыту саласындағы инновациялық технологияларға, түсті, асыл, сирек және сирек жер металдарының металлургиясына, перспективалы функционалдық материалдар мен жабындарға, сондай-ақ әртүрлі техникалық салалардағы процестердің математикалық моделдеріне арналды.
Конференцияда Сәтбаев университеті мен Металлургия және байыту институтының Корея, Ресей, Қытай, Малайзия, Индонезия елдерінің шетелдік университеттерімен және ғылыми-зерттеу институттарымен ынтымақтастық туралы келісімдерге қол қойылды.
Конференция нәтижесінде жаңа халықаралық білім беру бағдарламалары мен бірлескен ғылыми жобалар құрылады.
Баяндамалардың нәтижелері жинақта электронды форматта жарияланады.
Конференцияға Journal of Engineering Researcher and Lecturer, Teknomekanik, Минералдық шикізаттарды кешенді пайдалану, International Journal of Academic Studies in Scence and Education (Түркия) және Малайзия университеттері қауымдастығы консорциумы сияқты беделді журналдар қолдау көрсетті.
Конференция барысында қатысушылар Сәтбаев университетінің жаңа инновациялық инфрақұрылымын аралап көріп, конференцияның шетелдік қатысушылары үшін мәдени бағдарлама ұйымдастырылды.
