Металлургия және кен байыту институтының 80 жылдығына арналған халықаралық конференция
2025 жылғы 18–19 желтоқсанда Satbayev University базасында «Ғылымның өзекті мәселелері» атты халықаралық ғылыми-практикалық конференция өтті. Ауқымды ғылыми іс-шара Металлургия және кен байыту институтының 80 жылдық мерейтойына арналды және сирек әрі сирек жер металдарын өндіру мен өңдеу саласындағы озық ғылыми зерттеулер мен инновациялық технологияларды талқылауға бағытталды.
Конференцияның ашылу салтанатында Satbayev University ректоры Мейрам Бегентаев құттықтау сөз сөйлеп, Институттың отандық ғылымды дамытудағы тарихи рөлін атап өтті.
«Металлургия және кен байыту институтының 80 жылдығы — отандық ғылым үшін маңызды белес. Институт ұжымын осы айтулы мерейтойымен шын жүректен құттықтаймын», — деді Satbayev University ректоры М. Бегентаев.
Институттың қазіргі миссиясы мен болашақ даму бағыттарына тоқталған «Металлургия және кен байыту институты» АҚ-ның бас директоры, техника ғылымдарының докторы, профессор Б.К. Кенжалиев:
«Металлургия және кен байыту институтының 80 жылдық тарихы — отандық ғылымның тұрақтылығы мен жоғары зияткерлік әлеуетінің айқын дәлелі. Институттың жетістіктері Қазақстан Республикасының өнеркәсіптік-технологиялық дамуына елеулі үлес қосып келеді», — деп атап өтті.
Бүгінгі таңда Институт сирек және сирек жер металдарын кешенді өңдеу, жаңа функционалдық қорытпалар мен материалдар жасау, сондай-ақ жоғары технологиялық металлургиялық процестерді әзірлеу саласында еліміздегі жетекші ғылыми-зерттеу орталықтарының бірі болып табылады. Әлемдік нарықта стратегиялық маңызы бар бұл металдарға сұраныстың артуы жүргізіліп жатқан зерттеулердің өзектілігін одан әрі күшейтеді.
Қорытындылай келе, Б. Кенжалиев Институттың 80 жылдық тарихы ғылымға адалдықтың, табандылықтың және жаңашылдықтың жарқын үлгісі екенін атап өтті. Институт ғалымдары алдағы уақытта да ғылым мен өндіріс арасындағы өзара байланысты нығайтуға және Қазақстан Республикасының өнеркәсіптік әрі инновациялық дамуына үлес қосатын зерттеулер жүргізе бермек.
Конференция жұмысына Оңтүстік Корея, Египет, Иордания, Нигерия, Индонезия, Қытай, Ресей, сондай-ақ Қазақстан Республикасының ғылыми ұйымдары мен жоғары оқу орындарының ғалымдары қатысты. Конференция аясында өзекті ғылыми мәселелер бойынша 28 баяндама тыңдалды.
