AGH (Польша) делегациясының «Металлургия және кен байыту институты» АҚ-на сапары
2025 жылдың 8 қыркүйегінде Краков қаласындағы Станислав Сташица атындағы Тау-кен – металлургия академиясы (AGH) ғалымдарының делегациясы Металлургия және кен байыту институтына келді. Сапардың мақсаты ғылыми ынтымақтастықты орнату және нығайту, сондай-ақ инженерия, машина жасау, материалтану, ақпараттық технологиялар және металлургия салаларындағы бірлескен жобалардың перспективаларын талқылау болды. Делегация құрамында келесі ғалымдар болды: проф., доктор хаб. инж. Аг. Агнешка Копя (жұқа жабын технологиялары, наноматериалдар, трибология), доктор хаб. инж. Лукаш Рауц (қолданбалы информатика, өнеркәсіптік процестерді модельдеу), доктор хаб. инж. Кшиштоф Мущка (металдарды термомеханикалық өңдеу, физикалық материалтану), доктор хаб. инж. Моника Пернах (өнеркәсіптік үдерістерді оңтайландыру, цифрлық өндіріс), доктор хаб. инж. Пётр Мигас (өндіруші металлургия, қалдықтарды қайта өңдеу, жасыл металлургия), сапардың үйлестірушісі AGH-тің Орталық Азия университеттерімен ынтымақтастығына жауапты профессор Яцек Циеслик.
Жұмыс кеңесі өтіп, онда «Металлургия және кен байыту институты» АҚ атынан химия ғылымдарының кандидаты, сирек шашыраған элементтер зертханасының меңгерушісі Фишер Дәметкен Еділқызы баяндама жасады. Ол институттың ғылыми әзірлемелерімен таныстырды және AGH-мен ықтимал ынтымақтастықтың негізгі бағыттарын атап өтті. Польшадан келген Академия ғалымдары ғылыми жобалардың презентацияларын жасады және академиялық және қолданбалы зерттеулер аясында ынтымақтастық перспективаларымен таныстырды. Техника мен технологияның басым бағыттары бойынша ынтымақтастықты дамыту нұсқалары, сондай-ақ бірлескен білім беру бағдарламаларына, тағылымдамалар мен ғылыми жарияланымдарға қатысу мүмкіндігі қарастырылды.
