Қазақстан Республикасының Әл-Фараби атындағы Мемлекеттік сыйлық ғылым мен техника саласындағы көрнекті жетістіктерді тану болып табылады
Ғалымдар мен инженерлердің қоғам мен мемлекет алдындағы еңбегін танудың ең жоғары нысаны болып табылатын 2025 жылғы ғылым және техника саласындағы әл-Фараби атындағы Қазақстан Республикасының Мемлекеттік сыйлығы «Кондициялық емес түcтi металлургияның шикiзатынан жоғары сапалы селен алудың экологиялық қауiпсiз вакуум-термиялық технологиясын дайындау және оның өнеркәсiптiк өндiрiсiн ұйымдастыру» тақырыбы бойынша жұмысы үшін:
«Металлургия және кен байыту институты» акционерлік қоғамының бас директоры – басқарма төрағасы, техника ғылымдарының докторы, профессор Бақдәулет Кенжәлiұлы Кенжәлиевке;
«Металлургия және кен байыту институты» акционерлік қоғамының вакуумдық процестер зертханасының бас ғылыми қызметкері, техника және физика-математика ғылымдарының докторы, профессор Валерий Николаевич Володинге;
«Қазақмыс корпорациясы» жауапкершілігі шектеулі серіктестігінің кешенді технологияларды дамыту және инвестицияларды жоспарлау департаментінің директоры, техника ғылымдарының докторы Ержан Арыстанбекұлы Оспановқа;
«Металлургия және кен байыту институты» акционерлік қоғамы бас директорының орынбасары, вакуумдық процестер зертханасының жетекші ғылыми қызметкері, техника ғылымдарының кандидаты, профессор Сергей Анатольевич Требуховқа;
«Қазақмыс корпорациясы» жауапкершілігі шектеулі серіктестігінің кешенді технологияларды дамыту және инвестицияларды жоспарлау департаменті техногендік шикізатты кешенді қайта өңдеу басқармасының бастығы Александр Александрович Шахаловқа берілді.
Институт бас директоры Б.К. Кенжалиев Республика күнімен және ұжымның жетістігімен барша әріптестерді шын жүректен құттықтады:
«Бұл жеңіс – біздің ұжымның, ғалымдар мен инженерлердің еңбегінің нәтижесі. Олардың табандылығы мен кәсібилігі Қазақстан ғылымының дамуы мен металлургия саласындағы инновациялық серпіліске жол ашты. Баршаңызға мықты денсаулық, табыс және жаңа ғылыми белестер тілеймін!»
Әл-Фараби атындағы Мемлекеттік сыйлық – елдің ғылыми қауымдастығы үшін зор мәртебе және Қазақстан ғылымының әлемдік деңгейдегі жетістігін айғақтайтын маңызды оқиға. Әзірленген технология Қазақстанға халықаралық сапа стандарттарына сай келетін жоғары сапалы селеннің өзіндік өнеркәсіптік өндірісін құруға мүмкіндік берді. Бұл тек технологиялық жетістік емес, бұл ғылымға, инновацияға және табиғи ресурстарды мұқият пайдалануға негізделген тұрақты, экологиялық жауапты металлургияны дамытудағы жаңа қадам.
Әл-Фараби сыйлығы – бұл ұжымның елдің өнеркәсіптік және ғылыми-техникалық әлеуетін дамытуға қосқан елеулі ғылыми үлесін тану және жоғары құрмет. Бұл жұмыс «Металлургия және кен байыту институты» АҚ мен «Қазақмыс корпорациясы» ЖШС арасындағы тығыз ынтымақтастықтың нәтижесі болып табылады, олар ғылыми әлеует пен өндірістік тәжірибені біріктіріп, отандық ғылымды, технологияны және өндірісті дамытуға бағытталған озық шешімдерді енгізді.
«Металлургия және кен байыту институты» АҚ ұжымы Бақдәулет Кенжалыұлын және авторларды жоғары мемлекеттік марапатымен – Қазақстан Республикасының әл-Фараби атындағы Мемлекеттік сыйлығымен құттықтайды!
